التوجيهي فرحة ام نكبة؟؟؟

كتير منا قدم توجيهي او عم يقدم توجيهي او مش ناوي يغلط هاي الغلطة في حق نفسو او المجتمع ... وين ما رحت في دول الوطن العربي بتلاقي الطالب خايف من التوجيهي و بيحلم كوابيس و احلام مزعجة في شبح الثانوية العامة ... اسمحولي اسميها شبح لانو الثانوية العامة في الوطن العربي عبارة عن وحش الو 13 راس و ميت ايد و عيونو حمر رح يمسك الطالب و يوكلو و يحبسو في معدته 24 ساعة مع مجموعة من الكتب و رح يحرمو من الحياة الخارجية لمدة سنة على الاقل .. سؤال يطرح نفسو , لماذا هذا الخوف من التوجيهي ؟؟؟ او ما هي الاسباب الي بتخلي الطالب لما يسمع توجيهي يكش ؟؟؟ و ما هي نتائج الثانوية العامة على الطلاب و نفسيتهم ؟؟؟
اولا .... سياسة الترهيب و الترغيب عند الاهل:لما الطالب يكون على وشك بداية سنة التوجيهي امو و ابو بطلبو يجلسو معا جلسة تعذيبية قصدي عائلية ... و بحكولو ... يا حبيبي اوعى تفكر انو التوجيهي اشي بخوف هو سنة عادية زيها زي باقي السنوات ... بس ممنوع تطلع ممنوع تشيل راسك على الكتاب ممنوع ترتاح ممنوع تبتسم ممنوع تستخدم الموبايل ... اوقات الاكل و الحمام محسوبة بالتمام ... و ازا بتجيب اقل من تسعين ما في جامعة حكومية تستقبلك و احنا معناش ندرسك خاصة و مستقبلك رح ينهدم و ما في بنت رح تتزوجك و رح تترمى في الشوارع ... شايف يا بابا التوجيهي ما بخوف ... هدا طبعا غير كاسات العصير الي رايحة راجعة انا مش عارف شووو دخل العصير في التوجيهي يعني الطالب بدل ما يقضيها دراسة بقضيها في الحمام
...
تانيا ... من تدخل في ما لا يعنيه طالب التوجيهي لقي ما لا يرضيه:طبعا ضغوطات الطالب مش بس من الاهل اكيد طبعا الجارات لازم يلعبو دور في زيادة الضغط و تتعيب
النفسية و سمة البدن ... بتنط الجارة ام محمد بتحكي ... الله يرظى عليها بنتك انا متأكدة حتجيب الاولى على المملكة ... او بنط الجار ابو مرزوق و بحكي ... ابنك مبارح شفتو رفع راسو عن الكتاب 4 دقايق مش تضربو فهمو غلطو بس ... هدا غير اجتماع مجلس النواب تبع الجارات الي بيفتحو في نقاش تحت اسم " كيف سنجعل فأر التجارب الذي يسمى طالب الثانوية العامة يدرس اكتر ... و اخيرا و ليس اخرا ما ننسى التنافس الي بيصير بين الجارات لما يكون ولادهم توجيهي كل جارة بدها تكسر عين الجارة التانية عن طريق ابنها او بنتها ... و هدا طبعا لصالح الطالب ...
ثالثا ... اهلا و سهلا في بيتك الثاني " المدرسة " ...المدرسة و ما ادراكم ما المدرسة ... طبعا خلينا نبدا في المدير او المديرة الي لازم تعطي البهدلة الصباحية الي بتحكي عن انتاج الايدي العاملة الي اسمها طلاب التوجيهي ... و انو دفعة هاي السنة زبالة و مش عاجبها اشي ... طبعا هدا لمصلحة الطالب اوعى تفكرو انو المديرة هدفها تشهر حالها و تزيد من وضعها عن طريقنا ... و يا ويل طالب التوجيهي ازا لعب شوي او ضحك شوي او سهي شوي بيوكل بهدلة نصها تف ... و اكيد ما ننسى المعلمين و المعلمات الي بلاش تعميم نصهم ما بيفهمو اشي في المادة الي بدرسوها او بيفهمو في كل شي الا المادة الي بدرسوها و لما يكونو بدرسو الوحيد الي بفهم هم نفسهم .... و هم نفسهم الي بزعلو ازا كانت نتائج الثانوية العامة زي العما بعيد عنكم ...

>قصدي من كلامي يا خوان او يا اهالي ... انو بعرف انو سنة التوجيهي مهمة للطالب ... و الطالب بيعرف هدا الحكي بس مخ الطالب مش كمبيوتر ... و طالب التوجيهي انسان زينا زيو بدو يطلع و يشم هوا و يتسلى و كل شي بحدوود حلو ... يعني مافي
داعي نخلي طالب التوجيهي يحس حالو انحكم عليه بالاعدام ... يعني الدراسة الها وقتها و الراحة الها وقتها ... و لو سمحتو بلاش من العبارات المخيفة و المحبطة قصدي التشجيعية الي بسمعها الطالب كل يوم ... و بلاش العصير انا صارلي 3 سنين مخلص توجيهي و لحد الان قرفان العصير ... و يا طلاب التوجيهي ما تخافو و ما تسمعو من حدا ادرسو بحق الله و ما يهمكم اسمعو من هون و انسو من هون .... و انشالله اتحلى منكم كلكم على النتائج و المشرفين على الثانوية العامة ما تخافو جد زيها زي اي سنة ...

والله يا كبير معك حق والله يعينا على هاد الوضع